ಶ್ರೀಮಸಿಯಮ್ಮ: ಕಷ್ಟ-ಸಮಸ್ಯೆಗಳು (ಶ್ರೀ ನರಸಿಂಹ 35)

ರಚನೆ : ಸತೀಶ ತುಮಕೂರು

ತನಗಿಹ ಕಷ್ಟ,ಸಮಸ್ಯೆಗಳನೆ ಮನವು ಹಿರಿದೆಂದೆನುವುದು
ಪರಿಹಾರವೇನಿದಕೆಂದು ಹಲವು ದಾರಿಗಳ ಹುಡುಕುವುದು
ತಾಳ್ಮೆಯ ಕಳೆದು ಕೊಳ್ಳುವುದು ಮನಸು ಯೋಚನೆಯಲ್ಲಿ
ಸಹಿಸಲಾಗದೆ ಹುಟ್ಟುವುದು ಸಾವಿನ ಯೋಚನೆ ಮನದಲ್ಲಿ

ತನ್ನ ಕಷ್ಟಗಳೆ ಹಿರಿದೆನುತ ಮನಸಿನಲಿ ಕೊರಗುವುದು ಸಲ್ಲ
ಪರರ ಕಷ್ಟಗಳ ಅರಿತರೆ ಕಿರಿದೆನಿಸುವುದು ತನ್ನ ಕಷ್ಟಗಳೆಲ್ಲ
ಕಷ್ಟಗಳು,ಸಮಸ್ಯೆಗಳು ಎಂಬುದಿಹವು ಎಲ್ಲರ ಜೀವನದಲ್ಲಿ
ಎಲ್ಲವನು ಪರಿಹರಿಸಿ ಸಲಹುವನು ಶ್ರೀಹರಿ,ತಾಳ್ಮೆಯಿದ್ದಲ್ಲಿ

ಜೀವನದ ಕಷ್ಟಗಳೆಲ್ಲ ಸೂರ್ಯನಿಗೆ ಮುಸುಕುವ ಮೋಡದ ತೆರದಿ
ಶ್ರೀನರಸಿಂಹನ ಕೃಪೆಯ ಗಾಳಿ ಬೀಸಲು ಕಷ್ಟಗಳೆಲ್ಲಿಹುದು ಭವದಿ

ದೊಡ್ಡನಾರವಂಗಲ ಗ್ರಾಮಕ್ಕೆ ದಾರಿ

ತುಮಕೂರಿನಿಂದ ಗುಬ್ಬಿಗೆ ಹೋಗುವ ಬಿ ಹೆಚ್ ರಸ್ತೆಯಲ್ಲಿನ ಮಲ್ಲಸಂದ್ರ ರೈಲು ನಿಲ್ದಾಣದ ಎದುರಿನ ರಸ್ತೆಯನ್ನು ಹಿಡಿದು ಹೊರಟರೆ ,ಅಲ್ಲಿಂದ ಮೂರು ಕಿ.ಮೀ. ದೂರದಲ್ಲಿ ದೊಡ್ಡನಾರವಂಗಲ ಗ್ರಾಮ

ಸುತ್ತಲೂ ನೀರಿನ ಆಸರೆಗಾಗಿ ಇರುವ ಕೆರೆ ಗ್ರಾಮವನ್ನು ಸುತ್ತುವರೆದಿದೆ. ಅತ್ಯಂತ ಪುರಾತನ ರಾಮದೇವಾಲಯ (ಈಗ ಮರು ನಿರ್ಮಾಣವಾಗುತ್ತಿದೆ), ಈಶ್ವರ ದೇವಾಲಯ ಹಾಗು ಗ್ರಾಮದಲ್ಲೆಲ್ಲ ಭಕ್ತಿಯಿಂದ ಮಸಿಯಮ್ಮ ಎಂದು ಕರೆಯುವ ಶ್ರೀಮಹಿಷಾಸುರಮರ್ಧಿನಿ ಅಮ್ಮನವರ ದೇವಾಲಯಗಳಿವೆ

ಗ್ರಾಮದ ಸುತ್ತ ಹಸಿರು ನೆಲಹರಡಿದೆ. ತೆಂಗಿನ ತೋಟಗಳು, ಭತ್ತದ ಗದ್ದೆಗಳು ಹೇಮಾವತಿಯ ನೀರಿನ ಹರಿವು ಎಲ್ಲವೂ ಗ್ರಾಮವನ್ನು ಸುಂದರವಾಗಿಸಿದೆ