ಶ್ರೀಮಸಿಯಮ್ಮ: ವಿವಿಧತೆಯಲಿಹ ಏಕತೆ (ಶ್ರೀ ನರಸಿಂಹ 47)

ರಚನೆ : ಸತೀಶ ತುಮಕೂರು

ವಿವಿಧ ರೂಪದಲಿ ಆಭರಣಗಳ ಮಾಡಿದರೇನು
ಲೋಹ ಬಳಸಿರುವುದದಕೆ ಒಂದೆ ಅಲ್ಲವೇನು
ವಿವಿಧ ಹೆಸರಿನ ಪಾತ್ರಗಳ ನಟನು ಮಾಡಿದರು
ಮೂಲ ನಾಮದಲೆ ಅವನ ಎಲ್ಲ ಕರೆಯುವರು

ದೇವ ಸೃಷ್ಠಿಯೊಳಂತೆ ವಿವಿಧ ದೇಹಗಳಿಹುದು
ಎಲ್ಲ ದೇಹದೊಳಗಿರುವ ಶಕ್ತಿ ಒಂದೆ ಆಗಿಹುದು
ಮನಸಿನಹಮಿಕೆಯಿಂದಲಿ ಬೇಧ ಕಾಣುವುದು
ನಾನು ನನದೆಂಬುವುದಳಿಯೆ ಬೇಧ ಎಲ್ಲಿಹುದು

ಜಗದಲಿಹ ಜೀವಗಳೆಲ್ಲ ನಿನ್ನಂತೆ ಎಂಬುವುದನರಿಯಬೇಕು
ಎಲ್ಲರಲಿ, ಎಲ್ಲದರಲಿ ಶ್ರೀ ನರಸಿಂಹನನು ನೀ ಕಾಣಬೇಕು

ದೊಡ್ಡನಾರವಂಗಲ ಗ್ರಾಮಕ್ಕೆ ದಾರಿ

ತುಮಕೂರಿನಿಂದ ಗುಬ್ಬಿಗೆ ಹೋಗುವ ಬಿ ಹೆಚ್ ರಸ್ತೆಯಲ್ಲಿನ ಮಲ್ಲಸಂದ್ರ ರೈಲು ನಿಲ್ದಾಣದ ಎದುರಿನ ರಸ್ತೆಯನ್ನು ಹಿಡಿದು ಹೊರಟರೆ ,ಅಲ್ಲಿಂದ ಮೂರು ಕಿ.ಮೀ. ದೂರದಲ್ಲಿ ದೊಡ್ಡನಾರವಂಗಲ ಗ್ರಾಮ

ಸುತ್ತಲೂ ನೀರಿನ ಆಸರೆಗಾಗಿ ಇರುವ ಕೆರೆ ಗ್ರಾಮವನ್ನು ಸುತ್ತುವರೆದಿದೆ. ಅತ್ಯಂತ ಪುರಾತನ ರಾಮದೇವಾಲಯ (ಈಗ ಮರು ನಿರ್ಮಾಣವಾಗುತ್ತಿದೆ), ಈಶ್ವರ ದೇವಾಲಯ ಹಾಗು ಗ್ರಾಮದಲ್ಲೆಲ್ಲ ಭಕ್ತಿಯಿಂದ ಮಸಿಯಮ್ಮ ಎಂದು ಕರೆಯುವ ಶ್ರೀಮಹಿಷಾಸುರಮರ್ಧಿನಿ ಅಮ್ಮನವರ ದೇವಾಲಯಗಳಿವೆ

ಗ್ರಾಮದ ಸುತ್ತ ಹಸಿರು ನೆಲಹರಡಿದೆ. ತೆಂಗಿನ ತೋಟಗಳು, ಭತ್ತದ ಗದ್ದೆಗಳು ಹೇಮಾವತಿಯ ನೀರಿನ ಹರಿವು ಎಲ್ಲವೂ ಗ್ರಾಮವನ್ನು ಸುಂದರವಾಗಿಸಿದೆ