ಶ್ರೀಮಸಿಯಮ್ಮ: ಸಾವಿನ ಭಯ (ಶ್ರೀ ನರಸಿಂಹ 40)

ರಚನೆ : ಸತೀಶ ತುಮಕೂರು

ಸಾಯಲೇಬೇಕಿಹುದೊಂದು ದಿನ ಎಂಬುದದು ದಿಟವು ಆದರೂ ಅದನು ನೆನೆಯೆ ಭಯಪಡುವುದು ಮನವು ದೇಹವೇ ತಾನೆಂದೆನುವ ಭ್ರಮೆಯಲ್ಲಿ ಮುಳುಗಿಹುದು

ದೇಹ ನಶಿಸುವುದೆಂಬುದ ಅರಿತು ಅರಿಯದಂತಿಹುದು ಸುಖವನರಸಿ ಹೊರಗಿರುವ ಮನಸ ಒಳಗೆ ತರಬೇಕು ದೇಹ ತಾನಲ್ಲವೆನುವ ಸತ್ಯವನು ಮನ ಅರಿಯಬೇಕು ಕಾಲನ ಕರೆಯೂ ಬರವುದದಕೆ ಸಮಯವೆಂಬುದಿಲ್ಲ ಸಾಧನೆಯ ಮಾಡದೆ ನೀ ಕಾಲ ಕಳೆವುದು ಸರಿಯಲ್ಲ ಹುಟ್ಟು ಸಾವುಗಳೆಂಬುವವು ದೇಹಕೆ ಹೊರತು ಆತ್ಮಕೇನಲ್ಲ ಮನಸನಿರಿಸು ಶ್ರೀನರಸಿಂಹನಂಘ್ರಿಯಲಿ ಭಯವೆಂಬುದಿಲ್ಲ

ದೊಡ್ಡನಾರವಂಗಲ ಗ್ರಾಮಕ್ಕೆ ದಾರಿ

ತುಮಕೂರಿನಿಂದ ಗುಬ್ಬಿಗೆ ಹೋಗುವ ಬಿ ಹೆಚ್ ರಸ್ತೆಯಲ್ಲಿನ ಮಲ್ಲಸಂದ್ರ ರೈಲು ನಿಲ್ದಾಣದ ಎದುರಿನ ರಸ್ತೆಯನ್ನು ಹಿಡಿದು ಹೊರಟರೆ ,ಅಲ್ಲಿಂದ ಮೂರು ಕಿ.ಮೀ. ದೂರದಲ್ಲಿ ದೊಡ್ಡನಾರವಂಗಲ ಗ್ರಾಮ

ಸುತ್ತಲೂ ನೀರಿನ ಆಸರೆಗಾಗಿ ಇರುವ ಕೆರೆ ಗ್ರಾಮವನ್ನು ಸುತ್ತುವರೆದಿದೆ. ಅತ್ಯಂತ ಪುರಾತನ ರಾಮದೇವಾಲಯ (ಈಗ ಮರು ನಿರ್ಮಾಣವಾಗುತ್ತಿದೆ), ಈಶ್ವರ ದೇವಾಲಯ ಹಾಗು ಗ್ರಾಮದಲ್ಲೆಲ್ಲ ಭಕ್ತಿಯಿಂದ ಮಸಿಯಮ್ಮ ಎಂದು ಕರೆಯುವ ಶ್ರೀಮಹಿಷಾಸುರಮರ್ಧಿನಿ ಅಮ್ಮನವರ ದೇವಾಲಯಗಳಿವೆ

ಗ್ರಾಮದ ಸುತ್ತ ಹಸಿರು ನೆಲಹರಡಿದೆ. ತೆಂಗಿನ ತೋಟಗಳು, ಭತ್ತದ ಗದ್ದೆಗಳು ಹೇಮಾವತಿಯ ನೀರಿನ ಹರಿವು ಎಲ್ಲವೂ ಗ್ರಾಮವನ್ನು ಸುಂದರವಾಗಿಸಿದೆ