ಶ್ರೀಮಸಿಯಮ್ಮ: ಪಂಚೇಂದ್ರಿಯಗಳ ಮಾಯೆ (ಶ್ರೀ ನರಸಿಂಹ 8)

ಪಂಚೇಂದ್ರಿಯಗಳ ಮಾಯೆ (ಶ್ರೀ ನರಸಿಂಹ 8)

ರಚನೆ : ಸತೀಶ್ ತುಮಕೂರು

ಕಣ್ಣು, ನಾಸಿಕ, ಜಿಹ್ವೆ, ತೊಗಲು, ಕರ್ಣಗಳು

ಪಂಚೇಂದ್ರಿಯಗಳಿವು ಹುಚ್ಚು ತುರಗಗಳಂತೆ

ಮನಸ ಸೆಳೆದೊಯ್ಯುವುದು ತನ್ನಿಚ್ಛೆಯಂತೆ

ಸಾಧನೆಯ ಹಾದಿಯಲಿ ಇದುವೆ ಮುಳುವಂತೆ

ಇಂದ್ರಿಯಗಳ ಬಯಕೆಯದು ಅಲೆಗಳೋಪಾದಿ

ಮನವನಿರಿಸು ಅದರೆದುರು ಬಂಡೆಯ ತೆರದಿ

ಇಂದ್ರಿಯಗಳ ಇರಿಸಲೊಳಿತು ಮನಸಿನಾದೀನ

ಮನಸಿನ ಬಯಕೆಗಳಿಗೆ ಹಾಕು ನೀ ಕಡಿವಾಣ

ಸಂಯಮದಿ ಸನ್ಮಾರ್ಗದಲಿ ನಡೆದು ನೀ ಉತ್ತಮನೆನಿಸು

ಬಿಡದೆ ಸಲಹುವನು ಶ್ರೀ ನರಸಿಂಹ ನಂಬಿದರೆ ಮನಸು

ದೊಡ್ಡನಾರವಂಗಲ ಗ್ರಾಮಕ್ಕೆ ದಾರಿ

ತುಮಕೂರಿನಿಂದ ಗುಬ್ಬಿಗೆ ಹೋಗುವ ಬಿ ಹೆಚ್ ರಸ್ತೆಯಲ್ಲಿನ ಮಲ್ಲಸಂದ್ರ ರೈಲು ನಿಲ್ದಾಣದ ಎದುರಿನ ರಸ್ತೆಯನ್ನು ಹಿಡಿದು ಹೊರಟರೆ ,ಅಲ್ಲಿಂದ ಮೂರು ಕಿ.ಮೀ. ದೂರದಲ್ಲಿ ದೊಡ್ಡನಾರವಂಗಲ ಗ್ರಾಮ

ಸುತ್ತಲೂ ನೀರಿನ ಆಸರೆಗಾಗಿ ಇರುವ ಕೆರೆ ಗ್ರಾಮವನ್ನು ಸುತ್ತುವರೆದಿದೆ. ಅತ್ಯಂತ ಪುರಾತನ ರಾಮದೇವಾಲಯ (ಈಗ ಮರು ನಿರ್ಮಾಣವಾಗುತ್ತಿದೆ), ಈಶ್ವರ ದೇವಾಲಯ ಹಾಗು ಗ್ರಾಮದಲ್ಲೆಲ್ಲ ಭಕ್ತಿಯಿಂದ ಮಸಿಯಮ್ಮ ಎಂದು ಕರೆಯುವ ಶ್ರೀಮಹಿಷಾಸುರಮರ್ಧಿನಿ ಅಮ್ಮನವರ ದೇವಾಲಯಗಳಿವೆ

ಗ್ರಾಮದ ಸುತ್ತ ಹಸಿರು ನೆಲಹರಡಿದೆ. ತೆಂಗಿನ ತೋಟಗಳು, ಭತ್ತದ ಗದ್ದೆಗಳು ಹೇಮಾವತಿಯ ನೀರಿನ ಹರಿವು ಎಲ್ಲವೂ ಗ್ರಾಮವನ್ನು ಸುಂದರವಾಗಿಸಿದೆ